London

Leikhús og söngleikir í London - kaupa miða

Það er fátt eins skemmtilegt og að bregða sér á gott leikrit eða söngleik í London. Úrvalið er afar mikið og stundum erfitt að velja. En hvernig er best að bera sig að við miðakaupin? Og hvernig er hægt að fá þá sem ódýrasta? - Best er að bera saman miðaverð nokkurra vefsíðna því það eru margir að selja miða gegnum vefinn.

• Theatre Tickets Direct
• UK Theatre Tickets
• London Theatre Direct

Ef þú vilt taka áhættu og bíða með miðakaup þar til á síðustu stundu - eða þar til þú ert komin/nn til London þá er hægt að fara á Leicester Square og athuga með miða hjá tkts á Leicester Square. Tkts var stofnað 1980 og er eini opinberi sölustaðurinn sem selur miða á hálfvirði og er n.k. útsölustaður fyrir leikhúsmiða frá the Society of London Theatre. Þetta er í lágreistu húsi á Leicester Square, opið mánudaga - laugardaga kl. 10.00 – 19.00 og sunnudaga kl. 11.00 - 16.00.

 

Athugið að fram til þessa hefur verið lítið um leiksýningar í London á sunnudagskvöldum en það kann þó að vera að breytast.

Official London Theatre Guide
Þetta er hin opinbera vefsíða leikhúsanna í London (the Society of London Theatre). Hér er hægt að gerast áskrifandi að fréttabréfi og fá tilboð send reglulega í tölvupósti.

Enn og aftur: Hér gildir að bera saman verð og sætaframboð.

Stephen Fry Live, 21. september 2010

Einn af hápunktum dvalar í London í september 2010 var að komast yfir miða á uppákomu með hinum vinsæla leikara og sjónvarpsmanni Stephen Fry. 

Miðann keypti ég á vefsíðu Royal Albert Hall og þurfti síðan að sækja hann fyrirfram á staðinn. Raunar einnig hægt að láta senda sér miðann.

Til að komast í Royal Albert Hall fór ég úr neðanjarðarlestinni í South Kensington en þaðan liggja þessi fínu undirgöng langleiðina í Royal Albert Hall (exit nr. 4) – þá kemur maður út á Exhibition Road,  gengur til vinstri upp að gatnamótunum (við Kensington Park), beygir aftur til vinstri og þá blasir Royal Albert Hall við.

Þegar inn í salinn var komið, ómaði amerísk „Sinatra“ tónlist bæði fyrir sýningu og í hléi (Everybody loves somebody.... o.s.frv.)  Skal játa að ég varð hissa á að fólk mátti fara með drykkjarföng inn í þennan flotta sal – allt frá kókflöskum upp í rauðvínsglös.

Afslættir - afsláttarmiðar fyrir allt milli himins og jarðar

Ertu á leið til London eða annarra borga í Bretlandi innan skamms? Eða viltu njóta afsláttarkaupa í gegnum netið? Hér koma ýmsar leiðir til þess að verða sér úti um afslætti hjá breskum verslunum, fyrirtækjum og á margvíslegri þjónustu.

Fyrir ferðalanga er líklega áhugaverðast að skoða afslætti varðandi veitingastaði, leikhús, söngleiki, hótel og jafnvel pakkaferðir frá Bretlandi en fyrir þá sem elska að fylgjast með á netinu er hægt að verða sér úti um afslætti á raftækjum, skóm, fatnaði og öllu mögulegu.

Skoðið slóðirnar hér fyrir neðan, skráið ykkur sem notendur, sem áskrifendur að fréttabréfum eða setjið "Like" á Facebókarsíður þar sem þær eru til staðar...

• Groupon
• VoucerCodes
• MyVoucherCodes
• NetVoucherCodes
• LivingSocial

Ferðalangur laumaðist til að nota póstnúmer í London hjá Groupon til að komast á skrá... en að öðru leyti kann að vera að stundum sé ekki hægt að senda til Íslands eða afgreiða íslensk VISA kort en þau dæmi sem Ferðalangur gerði tilraunir með strönduðu ekki á slíku.

Góða skemmtun :)